Prabu Dasamuka ngrasa gela lan
mangkel banget amarga patine patih Prahastha dening Anila. Indrajit banjur
nyagohi kanggo nggenteni Patih Prahastha kang wis seda. Nanging sadurunge
Indrajit mangkat, teka Raden Bukbis kang ngaku putrane Prabu Dasamuka karo Dewi
Urangrayung. Prabu Dasamuka ngongkon Raden Bukbis ngalahake Prabu Rama,
Leksmana, Wibisana sing ana ing pesanggrahan Swelagiri kanggo mbuktikake menawa
Raden Bukbis iku anake Prabu Dasamuka kang sejati. Raden Bukbis uga diangkat
langsung dadi senopati Ngalengka. Raden Bukbis banjur mangkat menyang
pesanggrahan Swelagiri.
Satekane ing pesanggrahan Swelagiri,
Raden Bukbis perang tandhing karo Anoman. Wusanane Raden Bukbis bisa dikalahake
dening Anoman. Prabu Dasamuka kang krungu kabar menawa Raden Bukbis wis mati,
sansaya muntab atine. Wusanane Prabu Dasamuka dhewe sing bakal ngadhepi Prabu
Rama, Leksmana lan Wibisana, nanging sadurunge mangkat teka Pratala Maryam kang
ngaku putrane Prabu Dasamuka karo Dewi Pratalawati. Prabu Dasamuka gelem
ngakoni menawa Pratala Maryam iku anake menawa Pratala Maryam bisa nggawa
sirahe Prabu Rama, Leksmana lan Gunawan Wibisana dhateng Prabu Dasamuka.
Pratala Maryam nyaguhi printahe Prabu Dasamuka mau.
Pratala Maryam banjur crita marang
ibune kedadeyan mau. Krungu critane Pratala Maryam, adhine Trigangga banjur
nulungi kakangne kanggo gawa sirahe Prabu Rama, Wibisana lan Leksmana. Bengine
Trigangga lunga menyang pesanggrahan Swelagiri, amarga duweni aji panyirep kang
gawe kabeh wadya bala keturon mula kanthi gampang Trigangga bisa gawa Prabu
Rama, Wibisana lan Leksmana menyang Giritala lan masrahake dhateng Pratala
Maryam.
Anoman kang lagi goleki Prabu Rama,
Wibisana lan Leksmana ketemu karo Trigangga. Anoman karo Trigangga perang gedhe
nganti gawe gegering khayangan. Banjur teka Bathara Narada kang nerangake
menawa Trigangga iku isih putrane Anoman. Trigangga nyuwun pangapura dhateng
Anoman, lan Anoman gelem ngakoni Trigangga iku putrane menawa dheweke bisa
mateni Pratala Maryam lan bisa nylametake Prabu Rama, Gunawan Wibisana lan
Leksmana kanthi slamet. Wusanane Trigangga bisa mateni Pratala Maryam lan gawa
bali Prabu Rama, Gunawan Wibisana lan Leksmana menyang pesanggrahan Swelagiri.
n.jpg)
0 komentar:
Posting Komentar